شەش ساڵ بەسەر کۆچى دوایی هونەرمەند حەمەجەزا تێپەڕی

هونەرمەند و پێشمەگە حەمە جەزا یەکێکە لە ناوە دیارەکانی هونەری کوردی، بەهۆی گۆرانی و سروودە نیشتمانیەکانیەوە خزمەتێکی زۆری بە هونەری کوردی کردووە، شەش ساڵ پێش ئێستا لە ڕۆژێکی وەک ئەمڕۆدا ئەم هونەرمەندە کۆچی دوایی کرد. هونه‌رمه‌ند حه‌مه‌جه‌زا هه‌ر له‌ منداڵییه‌وه ئاره‌زووی هونه‌ر و گۆرانی وتنی هەبووە. ئەمەش دەگەڕێتەوە بۆ ئەوەی بەشێک لە  بنه‌ماڵه‌که‌یان ده‌نگخۆش بوون. له‌ ته‌مه‌نی 19 ساڵیدا ژیانی هاوسه‌ری پێكه‌وه‌ ناوه‌و خاوه‌نی 6 منداڵه‌ (2 كوڕ و 4 كچ).

له‌ساڵی 1969دا “حه‌مه‌ جه‌زا” ده‌بێته ئه‌ندامی “تیپی هونه‌ر و وێژه‌ی کوردی” و له‌گه‌ڵ هاوته‌مه‌نه‌کانی خۆیدا وه‌ك “عوسمان عه‌لی”، “سه‌لاح مه‌جید”، “حه‌مه‌ی نێرگز” و هتد به‌شدای چه‌ندان ئاهه‌نگی موزیکی ده‌کات. بۆ یه‌که‌مجار له‌ساڵی 1970دا به‌ره‌وو شاری هه‌ولێر ده‌ڕوات و له ئاهه‌نگی 16ی ئابدا به‌شداری ده‌کات.

دواتر به‌ته‌واوه‌تی له هه‌ولێر نیشته‌جێ ده‌بێت و به‌هۆی خۆشی ده‌نگییه‌وه ژماره‌یه‌کی زۆر له دۆست و هاوه‌ڵانی بۆ په‌یدا ده‌بێت و به‌ته‌واوه‌تی له‌نێو هونه‌رمه‌ندان و ڕۆشنبیراندا ده‌ناسرێت.

ئەم هونەرمەندە یه‌که‌مین به‌رهه‌می تۆمارکراوی له‌ساڵی 1971دا به‌ناوی “بیبی خانم” بڵاوده‌کاته‌وه، که له سلێمانی له‌گه‌ڵ چه‌ند ئه‌ندامێکی “تیپی مۆزیکی باواجی کۆیه” تۆماری ده‌کات.

ساڵی 1977 به‌رهه‌مێکی دیکه‌ی به‌ناوی “ئیشق و ئازدای” هۆنراوه‌ی “هێمن موکریانی” و به‌ژه‌نینی ئامێری عود له‌لایه‌ن “ڕزگار خۆشناو” بڵاوده‌کاته‌وه. ئه‌م به‌رهه‌مه نوێیه‌ش ناوبانگێکی باش بۆ “حه‌مه جه‌زا” دروست ده‌کات و له‌ماوه‌ی ته‌نها دوو ڕۆژدا له‌سه‌رتاسه‌ری کوردستاندا بڵاو ده‌بێته‌وە.

له‌ساڵی 1977دا دوو گۆرانی له‌گه‌ڵ “تیپی مۆزیکی هه‌ولێر”دا تۆمار ده‌کات و دوای ساڵێک لەگەڵ هەمان تیپدا چوار گۆرانی دیکە بڵاو ده‌کاته‌وه.

هەروەها له‌ساڵی 1980دا دوو گۆرانی دیکه‌ له‌گه‌ڵ “تیپی مۆزیکی هه‌ولێر” به‌ئه‌نجام ده‌گه‌ێنێت”.

حه‌مه جه‌زا بەشێک لە بەرهەمەکانی له‌گه‌ڵ هونه‌رمه‌ندی عودژه‌ن “ڕزگار خۆشناو” به‌ئه‌نجام گه‌یاندووه.

 

ئەم هونەرمەندە دوای تۆمارکردنی به‌رهه‌می “ئیشق و ئازدای” له‌ساڵی 1977دا “شه‌نگه‌بێری” تۆمار ده‌کات و له‌ساڵی 1978یشدا “بووکی ئازادی و جوانی ناو چیا” تۆماردەکات. هه‌ر هه‌مان ساڵ “ناڵه‌ی جودایی” مامۆستای هێمن و  “گله‌یی له که‌س ناکه‌م” تۆماردەکات.

سه‌رجه‌م گۆرانییە تۆمارکراوه‌کانی حه‌مه جه‌زا 212 ده‌بن، ئەم جگه له به‌شداربوونی لە چەندین ئاهه‌نگ و فێستیڤاڵ و ئاهه‌نگی تایبه‌ت.

پاش بێزارییه‌کی زۆر و هه‌راسانکردن و ڕاوه‌دوونان له‌لایه‌ن ڕژێمی به‌عسه‌وه حه‌مه جه‌زا له 1981.05.23 شاری هه‌ولێر به‌جێده‌هێڵێت و به‌ره‌وو شاخ ده‌ڕوات. سه‌ره‌ڕای سه‌ختی ژیانی شاخ و پێشمه‌رگایه‌تی هونه‌رمه‌ندی ناوبراو له هونه‌ر دوورنه‌که‌وته‌وه و چالاکی خۆی له‌گه‌ڵ “تیپی مۆزیکی شه‌هید کارزان” درێژە پێدا و کۆمه‌ڵێك له سروودی نشتیمانی بۆ پێشمه‌رگه‌ و خه‌باتی ڕزگاریخوازی کوردستان تۆمارکرد.

 

حه‌مه جه‌زا لە ساڵی 1990 له‌گه‌ڵ خانه‌واده‌که‌ی چوونە وڵاتی دانیمارك و لەوێ نیشتەجیبوون،، زۆرجار سه‌ردانی کوردستانی ده‌کرده‌وه و به‌شداری چالاکی هونه‌ری ده‌کرد.

پاش ڕاپه‌ڕینی به‌هاری 1991 “حه‌مه‌ جه‌زا” له 1991.10.03 یه‌که‌مین ئاهه‌نگی له “یانه‌ی مامۆستایان” له‌گه‌ڵ “تیپی هونه‌ری هه‌ولێر” له‌شاری هه‌ولێر سازکرد. ”

له دوای 2000 ه‌وه چه‌ندان ئاهه‌نگی له هه‌ولێر، سلێمانی، که‌رکووك، ڕۆژهه‌ڵاتی کوردستان سازداوه و به‌‌شداری ده‌یان به‌رنامه‌ی ڕادیۆیی و ته‌له‌ڤزیۆنی کردووه. “لە ساڵی 2007 دا ئەم هونەرمەندە دووچاری شێرپه‌نجه‌ی په‌نکریاس ده‌بێت و به مه‌به‌ستی چاره‌سه‌ری پزیشکی سه‌ردانی وڵاته یه‌کگرتووه‌کانی ئه‌مه‌ریکا و زۆر شوێنی دیکه ده‌کات، به‌ڵام هیچ چارەسەرێک ناکرێت.

 

حه‌مه جه‌زا له‌پاڵ هونەری گۆرانی خه‌ریکی نووسینی هۆنراوه‌ش بوو و دیوانێکی گه‌وره‌ی به‌ چاپ گه‌یاندووه.

له 2009.10.26 “وه‌زاره‌تى ڕۆشنبیرى و لاوان له‌ “هۆڵى پێشه‌وا”ی شاری هه‌ولێر خه‌ڵاتى ڕێزلێنانى به‌خشییه‌ هونه‌رمه‌ند و پێشمه‌رگه‌ “حه‌مه‌جه‌زا”.

پێشمەرگە و هونەرمەند حەمە عه‌لی له ٣ ی شووباتی ١٩٤٩ له شاری سلێمانی لەدایکبووە. دوای چەندی ساڵ لە خەباتی پێشمەرگایەتی و کاری هونەری، ڕۆژی هه‌ینی ١ ی تشرینی یەکەمی ٢٠١٠ بەهۆی نەخۆشی شێرپەنجەی پەنکریاسەوە کۆچی دوایی کرد، هه‌مان ڕۆژ له کاژاوه‌یه‌کی شایسته‌دا و به‌ ئاماده‌بوونی ژماره‌یه‌كی زۆری بنه‌ماڵه‌ و كه‌سوكار و دۆستان و هاوڕێیانی له‌ گردی سه‌یوان له‌ سلێمانی ته‌رمه‌كه‌ی به‌خاك سپێردرا.

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *